“家风讲古”系列

第四十则

《脱草鞋》

当年出洋离祖宗，翻山越岭穿草鞋。

草鞋阿母透暝做，鞋头巧打一蕊花。

漂洋过海穿草鞋，走过千条万条街。

叶落归根返回家，亲人为我脱草鞋。

记得阿母一句话：一支草，一点露，

富贵也着想当初，乌篮血迹是家乡。

《堂伯来祭祖》

我堂伯和堂姑，一刮人，十外个。

从南洋，来祭祖，开祠堂，看族谱，要吃薯糊掺薯箍。

堂伯堂姑伊两人，双手捧起番薯糊，目屎流落像落雨。

一边吃，一边嚎，诉起过去苦，一日两顿番薯糊。

物配是咸腌脯，难得吃着番薯箍。

《想起家乡好水果》

过番出外几十年，想到家乡好水果。

二月枇杷黄，三月桃合李，

四月杨梅熟，五月出荔枝，六月檨仔好上市，

七月八月挽龙眼，九月十月秋风起，

大小爱吃霜降柿，冬尾桔仔每粒红，年兜吃到正月时。

水果好吃树难种，一滴汗来一滴水；

家乡亲人勤种作，四季水果香更甜。

《数宫灯》

三公宫，正月半。

人点灯，恁来看。

看什么？数宫灯。

今年宫灯有几盏？

鼓仔灯、绣球灯、鲤鱼灯、

莲花灯，人成海，灯成山。

千盏灯、万盏灯，

一半在台湾，一半在唐山。